Asr (part 55)

"އަހަންނަށް ކިހިނެއްހޭ އެނގެނީ؟؟!! އެއީ އަހަރެންގެ ދައްތަ! ދައްތައަށް ހިދާޔަތް ލިބުމުން ދައްތައަށް އައި ބަދަލު އެންމެ ގާތުން ފެނިފައި ހުރި އެކަކީ އަހަރެން. ދައްތަ އެންމެ ގިނައިން ނަޞޭޙަތްދިން އެކަކީ އަހަރެން. އެ މަންސޫރު އަހަރެންގެ ލޯ ކުރިމަތިންނޭ ދައްތައަށް އެ ހުރިހާ އަނިޔާއެއްދިނީ. ޔާސިރުމެން އެޕާޓްމެންޓްގެ ޑުޕްލިކޭޓް ތަޅުދަނޑި ވަގަށް ނަގައިގެން އެރޭ އެޕާޓްމެންޓަށް ވަދެ ދައްތަ ޤަތުލު ކުރީ އަހަރެން ބަލަހައްޓައިގެން ހުއްޓައޭ!" ޝިޔާ މޭމަތީގައި ޝަހާދަތް އިނގިލި ޖައްސައިގެން ހުރެ ރޮވިފައިވާ އަޑަކުން ބުނެލިއެވެ. ޝިޔާއަށް އައި ކުއްލި ބަދަލުގެ ސަބަބުން ދުރުގައި ކޮޅަށް ހުރި އައިމަން ހުއްޓުން އަރާ ގޮތްވިއެވެ. ޝިޔާގެ މޫނުމައްޗަށް ވެރިވެފައިވި ހިތާމަވެރިކަން ފެނިފައި އޭނަގެ މެއަށް ގޮތެއްވިއެވެ. ޝިޔާ އެ ހަދަނީ ދޮގެއްނޫންކަން ޝިޔާގެ ދެލޯ އައިމަނަށް ސާބިތުކޮށްދިނެވެ. އެ ހިނދު އޭނަ ޝިޔާއަށް ޙަމްދަރުދީވިއެވެ. އަމިއްލަ އެއްބަނޑު އެއްބަފާ ދައްތައަކު ލޯ ކުރިމަތިން ދުނިޔެއާއި ވަކިވެގެން ދާ މަންޒަރަކީ ކިހާ ހިތްދަތި މަންޒަރެއްކަން އައިމަނަށް އަންދާޒާއެއް ވެސް ނުކުރެވޭނެއެވެ. ޝިޔާ ވަނީ އެ ހިތްދަތިކަން ކާމިޔާބުކަމާއެކީ ކަނޑައްތު ކޮށްފައެވެ. އެކަމަށްޓަކައި އައިމަނަށް ހިތާހިތުން ޝިޔާއަށް ތަޢުރީފު ކުރެވުނެވެ. އޭނަ އެއްޗެކޭ ބުނަން ނޭނގިފައި ހުއްޓާ ޝިޔާ އަނެއްކާވެސް ވާހަކަ ދެއްކިއެވެ.

"އައިމަން މި ވާހަކަ ޤަބޫލު ނުކުރިޔަސް ވަކި މައްސަލައެއް ނެތް. މާތް ﷲ ޙަޤީޤަތް މޮޅަށް ދެނެވޮޑިގެންވޭ. އަދި ދައްތައަށްޓަކައި އިންސާފު މި ދުނިޔޭގައި ނުލިބުނަސް އާޚިރަތުގައި އެކަލާނގެ ދައްތައަށް އިންސާފު ހޯދައިދޭނެކަމީ ޝައްކެއް އޮތްކަމެއްނޫން.....އެކަމަކު އައިމަން އެދުވަހު އަހަރެން ޙަވާލުކުރި އަމާނާތް އޭގެ ވެރި ފަރާތާއި ޙަވާލުކުރަން ބޭނުމެއްނުވާނަމަ އޭތި އަނބުރާ އަހަރެންގެ އަތަށް ދިނުން އެދެން. އެއީ ދައްތަ އަހަންނަށް ވަރަށް އިތުބާރުކޮށްފައި ދައްތަގެ އެންމެ ފަހު ވަގުތުކޮޅުތަކުގައި އަހަންނާ ޙަވާލު ކުރި އެއްޗެއް. އެ ސިޓީ ވިސާމްބެއާއި ހަމައަށް ނުފޯރިއްޔާ އަހަންނަށް ދުވަހަކުވެސް އަމިއްލަ ނަފްސަށް މަޢާފެއް ނުކުރެވޭން..." ޝިޔާއަށް އެހާ ހިސާބަށް ވާހަކަ ދެކެވުނުތަނާހެން އޭނަގެ އަރުތެރެ ބެދި މެރިގެން ދިޔަ އޭނަގެ އެސްފިޔަތަކުގެ ދޭތެރެއިން ކަރުނަ ފައިބަން ފެށިއެވެ. އައިމަނަށް އެ މަންޒަރު ފެނިފައި އުނދަގުލެއް ވެގެން އުޅޭ ފަދައަކުން ކުރިއަށް ފިޔަވަޅެއް އަޅާލެވުނެވެ. އެހެނަސް ނޭނގޭ ސަބަބަކާހުރެ އޭނައަށް ކުރިއަށް ދާކަށް ނުކެރުނެވެ. އެހެންކަމުން އައިމަނަށް ދެބުމަ ކައިރިކޮށްގެން ބަލަހައްޓައިގެން ހުރުން ނޫންކަމެއް ނުކުރެވުނެވެ. އޭނަ ބަލަބަލާ ހުއްޓާ ޝިޔާ އޭނަގެ ކަރުނަތައް ފޮހެލަމުން އަނެއްކާވެސް ވާހަކަ ދެއްކިއެވެ.

"ޕްލީޒް.....އަހަންނަށް އޭތި އަނބުރާ ދީ. އަސްލު އައިމަންގެ އަތަށްދިނީ އަހަންނަށް އަވަސް މުސްތަޤްބަލެއްގަ ވިސާމްބެއާއި ހަމައަށް އޭތި ފޯރުކޮށްނުދެވޭނެހެން ހީވާތީ. ޔާސިރާއި މަންސޫރަށް އެނގޭ އަހަރެންގެ އަތުގަ ކަން އެ ސިޓީ އޮތީ. އެމީހުން މިއަދު ވެސް އޭތި އޭގެ ޙަޤީޤީ މަންޒިލާއި ހަމައަށް ދިޔުމަށް ހުރަސް އެބައަޅާ....އެ ސިޓީ އޮތީ އަހަރެންގެ އަތުގަކަން އެންމެ ފުރަތަމަ އެނގުނީ ޔާސިރަށް. އެއީ ޔާސިރު ފިލްމީ ދާއިރާ ދޫކުރުމަށްފަހު އޭނަގެ އަންހެނުންނާ އެކީ ލަންކާއަށް ބަދަލުވިފަހުން. ވިޔަފާރީގެ ތެރެއިން ޔާސިރާއި ބައްޕަ އެކުވެރިވެގެން ދިޔައީ. އަހަރެން އުޅުނިން އެންމެ ފުރަތަމަ ވެސް ބައްޕަމެން ކައިރި ޔާސިރުގެ ވާހަކަ ބުނަން. އެކަމަކު ޔާސިރު އެއަށްވުރެ ކުރިން......އަހަންނަށް ބިރު ދައްކައިފި. އޭނައަށް އެ ސިޓީ ވެސް ފެނިގެން ދިޔައީ އޭނަ އަހަރުމެންގެ ގެއަށް ކުރި ޒިޔާރަތެއްގެ ތެރެއިން. އެފަހަރު އަހަރެން ޒައިދް މެދުވެރިކޮށް އެ ސިޓީ އަނބުރާ ހޯދިން. އެކަން ޔާސިރަށް އެނގުނު ދުވަހު ޔާސިރު ޒައިދަށް ވެސް ހުރިހާ ވާހަކައެއް ކިޔައިދީފި. އޭގެ ފަހުން ޒައިދް ވެސް ހުންނަނީ އޭނަގެ ބައްޕަގެ ކޮޅުގަ." ޝިޔާ ކިޔައިދިނެވެ. އޭނަ އެންމެ ފަހަކަށް ބުނެލި ވާހަކައިން އިސްޖެހިފައި ހުރި އައިމަނަށް ދެލޯ ބޮޑުކޮށްފައި އިސްއުފުލާލެވުނެވެ.

"ޒައިދް......އަކީ....." އައިމަންގެ ވާހަކަ މެދުކެނޑުނެވެ.

"ޔާސިރުގެ ދަރިފުޅު......ބައްޕަ އަހަންނަށްޓަކައި އިންނާނެ މީހަކު ހޯދަންފެށިތާ މާ ގިނަ ދުވަހެއްނުވެ ޔާސިރު އަހަންނާއި ޒައިދް ގުޅުވުމުގެ ޚިޔާލު ބައްޕައަށް ދިން. އެއީ ވެސް ބައްޕައަށް އޭނަ ކުރި ޤަތުލުގެ ޝައްކެއްނުވާނެ ފަދަ ގޮތަކަށް ރޭވި ރޭވުމެއްކަން އަހަންނަށް އެނގުނު. އަހަރެން ވަގުތުން ކައިވެންޏަށް އިންކާރު ކުރަން ބޭނުންވި. އެކަމަކު ޒައިދްވެސް އިންނަން ބޭނުންވާކަން އެނގުނީމަ ޞާލިޙު މީހެއްގެ އެދުމަކަށް ފުރަގަސް ދެވިދާނެހެން ހީވީތީ އެކައިވެންޏަށް އެއްބަސްވީ. އެކަމަކު ޒައިދްއަކީ އެއްވެސް ގޮތަކުން އަހަންނަށް ކަމުދާ ޒާތުގެ މީހަކަށް ނުވި...." އައިމަނާއި ދިމާލަށް ބަލަމުން ނުބަލަމުން ޝިޔާ ދެއްކި ވާހަކަ އެހާ ހިސާބަށް ދިޔަ ތަނާހެން އައިމަން އިންތިހާ ދަރަޖައިގެ ނުރުހުންތެރިކަމާއެކީ ވާހަކަ ދެއްކިއެވެ.

"ފޯ ގޯޑް'ސް ސޭކް ޝިޔާ ޓެލް ޔުއާރ ޑޭޑް! މުޅި ޢުމުރު ހޭދަކުރަން ބޭނުންވަނީ އަމިއްލަ ދައްތަ ޤަތުލު ކުރި މީހެއްގެ ދަރިއަކާއި އެކީގަތަ؟" އައިމަންގެ އަޑު ހިސާބަކަށް ހަރުވިއެވެ. ހުރެވުނު ތަން ފަޅި ސިކުންތެއްގެ ތެރޭގައި ނަގައިގަނެވުމުން އޭނައަށް ވާތް ފަރާތަށް ބަލާލެވުނީ އޮފީސްތެރޭގައި މީހަކު ހުރިތޯ ބެލުމަށެވެ. އެއްވެސް މީހަކު ނެތްކަން އެނގުމުން އޭނައަށް ހިސާބެއްގެ ހަމަޖެހުމެއް ލިބުނެވެ. އޭނަ ދެންވެސް އެއްޗެކޭ ބުނަން އުޅުނުތަނާހެން ޝިޔާ އޭނައަށް ޖަވާބުދޭން ފެށިއެވެ.

"ޔާސިރަކީ ބައްޕަ ދެލޯ މަރައިގެން އިތުބާރު ކުރާ މީހެއް. އޭނަ ވަނީ އަހަރުމެންގެ ޢާއިލާއަށް ގިނަގުނަ އެހީތަކެއްވެދީފަ. އަހަރެން ބުންޏަސް ބައްޕަ ފަސޭހައިން ޤަބޫލުކުރާނެހެނެއް ހިއެއްނުވޭ. ވަކިން ޚާއްޞަކޮށް އަދި ޒައިދްއަށް އަހަރެން ނުރުހުންވާހެން ބައްޕަމެންނަށް ހީވެފައި އޮތްވާ އެ ސިޓީ ދެއްކީމަ ވެސް ބައްޕަމެންނަށް ހީވެދާނެ އެއީ އަހަރެން ކައިވެނި ރޫޅުމަށްޓަކައި އަމިއްލައަށް ލިޔުނު އެއްޗެއްހެން. ދައްތައަށް ފުރިހަމަ މިނިވަންކަން ދިނުމުގެ ނަތީޖާ ނިކުތް ގޮތުން ބައްޕައާއި މަންމައަށް އަހަންނަށް އިތުބާރު ކުރުމަކީ ވަރަށް ދަތިކަމެއް. އަދި ވަކިން ޚާއްޞަކޮށް މަންމައަށް އަހަރެން އެހެން ކުއްޖެއްދެކެ ލޯބި......." އެހާ ހިސާބަށް ވާހަކަ ދެކެވުނުތަނާހެން ޝިޔާގެ ދުލުގައި ތަޅުއެޅުވުނު ފަދައެވެ. ހަމަ އެ ހިނދު ޝިޔާއާއި އައިމަންގެ ހަތަރުކަޅި ބައްދަލުވެގެން ދިޔައީ ނުފެންނަ ފަދަ ގޮތަކަށް އެދެމެދުގައި ވާހަކައެއް ދެކެވުނު ފަދައަކުންނެވެ. އެ ވަގުތުކޮޅުވެގެން ދިޔައީ އެ ދެހިތުގެ ތެޅުންވެސް އަވަސްކުރުވި ވަގުތުކޮޅަކަށެވެ. އެހެނަސް ޝިޔާ އެ ވަގުތުކޮޅު މާ ގިނައިރު ވަންދެން ދެމިދިޔަ ނުދިނެވެ. އޭނަ ވަގުތުން އަނެއްކާވެސް އައިމަނަށް ފަސްދީފައި ދާން ހިނގައިގަތީ އޭނަ އައިމަންގެ އަތުން އެއްޗެއް ހޯދަން ބޭނުންވާކަން ވެސް ހަނދާން ނައްތާލަމުންނެވެ. ނަމަވެސް އޭނައަށް މާ ދުރަކަށް ނުދެވެނީސް އައިމަން އަނެއްކާވެސް އޭނަގެ ނަމުން ގޮވާލި އަޑުއިވުނެވެ. މިފަހަރުވެސް ޝިޔާއަށް ފިޔަވަޅުތައް މަޑުޖައްސާލެވުނެވެ.

"މިއަދަށްފަހު އެ ސިޓީއަކީ ޝިޔާގެ ޒިންމާއެއްނޫން. އަހަރެންގެ ޒިންމާއެއް. އަހަރެން ހުރިހާ ކަމެއް ރަނގަޅު ކުރާނަން. އައި ވިލް ފިކްސް އެވްރީތިންގް. އައި ޕްރޯމިސް....." އައިމަން އޭނަގެ ފަހު ޖުމްލަތައް ބުނެލީ ފުން މާނަތަކެއް އެކުލެވޭފަދަ ގޮތަކަށެވެ. އެ މާނަތައް ނަގައިގަނެވުނު ޝިޔާގެ ހިތަށް ކުރި އަސަރާއެކީ އޭނައަށް ދެލޯ މަރާލެވުނެވެ. އައިމަން ރަނގަޅުކުރަން އުޅޭ "ހުރިހާ ކަމެއް"ގެ ތެރޭގައި އޭނަގެ ހިތްވެސް ލެއްވުމަށްއެދި ޝިޔާއަށް ހިތާހިތުން ދުޢާކުރެވުނެވެ. އާދައިގެ މަތިން އޭނަގެ ދުޢާއަށްފަހު ޝިޔާ އޭނަ ﷲ އަށް އެދުނު ކަމަށްޓަކައި ފިޔަވަޅެއްވެސް އަޅަން ބޭނުންވިއެވެ.

"އައިމަން......އެ ސިޓީގައި ދައްތަ ލިޔެފަ ހުރި އާޔަތްތައް ރަނގަޅަށް ކިޔައްޗޭ. ދައްތަ ތި ސިޓީގަ އެ އާޔަތްތައް ހިމަނާފަ ހުރީ ސިޓީ ކިޔާ ކޮންމެ މީހަކަށް ވެސް ރަނގަޅު މަގު ފެނިދާނެކަމުގެ އުއްމީދުގަ. އޭގެ ޘަވާބާއި ދަރުމައަށް އެދިގެން. ތި ސިޓީ ދައްތަ އަހަރެންގެ އަތަށް ލައިދިން އިރު ވެސް އަހަރެން ގާތު އެދުނު އެ ޞަފްޙާތައް ދައްކާފަ ވީހާވެސް ގިނަ މީހުންނާ އެ ޞަފްޙާތައް ޙިއްސާކުރުމަށް. އެކަން އަހަންނަށް ކުރެވިފައެއްނެތް. އެހެންވީމަ އައިމަން އެކަން ކޮށްދިނުމަކީ އަހަރެންގެ ވަރަށް ބޮޑު އެދުމެއް. އައިމަން އެ ޞަފްޙާތައް ކިޔާފައި އައިމަންގެ ބޭބެއާއި ޢާއިލާގެ އެހެން މީހުންނާ ވެސް އެ ޞަފްޙާތައް ޙިއްސާކުރުން އެދެން، އިން ޝާ ﷲ." ޝިޔާ އުއްމީދުން ފުރެމުން ދިޔަ ހިތަކާއެކީ ބުނެލިއެވެ. ކީއްވެ ކަމެއް ނޭނގެއެވެ. މިފަހަރު އޭނަގެ ދުޢާތައް އިޖާބަނުވެ ނުދާނެހެން އޭނައަށް ހަމަ ހީވަނީއެވެ. އެހެން ނުވާންވީ ސަބަބެއްނެތެވެ. އައިމަނާއި ފުރަތަމަ ވަކިވެގެން ދިޔުމަށްފަހު ޚުދު އޭނަގެ ވެސް ހިތްދަތިވެފައިވަނިކޮށް އޭނައަށް ހިތްވަރެއް ލިބިގެން ދިޔައީ ދައްތަ ފަށުވި ޢިބާރާތްތަކުން ލިޔެފައިވި ނަޞޭޙަތްތަކުގެ ސަބަބުންނެވެ. ހިތް ﷲ ގެ ހަނދުމައިން ފުރިގެން ދިޔައީ ﷲ އާއިމެދު އިތުރަށް އުނގެނެން ދައްތަ ދީފައިވި ހިތްވަރުންނެވެ. އެކަމަށްޓަކައި އޭނައަށް ދައްތައަށްޓަކައި އެތައް ފަހަރަކު ދުޢާ ކުރެވެއެވެ. މިފަހަރުވެސް އޭނައަށް ދައްތައަށްޓަކައި ދުޢާކުރި ތަނާހެން ކޮންމެވެސް މުދައްރިސަކު އޭނައަށް ގޮވާފައި އޭނަ ބަލާ އައިސްފި ކަމަށް ބުނެލައިފިއެވެ. އެއާއެކު ޝިޔާ އައިމަނަށް އިތުރަށް ބެލުމެއްނެތި ދާން ހިނގައިގަތެވެ.

އެދުވަހު އައިމަން ގެއަށް ދިޔައީ ވިސްނުމެއްގެ ތެރޭގައި ހުރެއެވެ. ޝިޔާ އެ ވަރަކުން އޭނަގާތު ސިޓީގައިވި އާޔަތްތައް ކިޔަން އެ އެދެނީ ކީއްވެބާއޭ އޭނަގެ ހިތަށް އަރަމުން ދިޔައެވެ. އޭނަ ސިޓީ ކިޔަމުން ދިޔައިރު އާޔަތްތަކާއި އޭގެ މާނަތައް ލިޔެވިފައި ހުރި ޞަފްޙާތައް ދޫކުރަމުން ދިޔައީ އެއީ "ބޭކާރު" ބައެއްހެން ހީވީތީވެއެވެ. އަޅެފަހެ މެހެނާޒް ލިޔެފައިވި ސިޓީއަކުން މެހެނާޒްގެ ވާހަކައެއް ކިޔައިނުދޭ ޞަފްޙާއެއް ފެނުމުން މީހަކު ފޫއްސެއްނުވާނެ ހެއްޔެވެ؟ ކޮންމެ ގޮތެއްވިޔަސް އެދުވަހު ގެއަށް ގޮސް އަނެއްކާވެސް އައިމަން އެ ސިޓީ އަނބުރާ ނެގިއެވެ. އެއަށްފަހު ޝިޔާ އެ ބުނި ޞަފްޙާތަކުގެ ތެރެއިން އެއް ޞަފްޙާ ހުޅުވާލިއެވެ. އެ ޞަފްޙާގެ އެންމެ މަތީގައި ލިޔެވިފައިވީ ރަޢްދު ސޫރަތުގެ ކުރު އާޔަތެކެވެ. އެއީ އައިމަން ދުވަހަކުވެސް ނަން އަޑުއަހާފައިވާ ސޫރަތެއްނޫނެވެ. އެ އާޔަތުގެ މާނައިގައި އޮތީ ހިތްތަކަށް ހަމަޖެހުން ލިބެނީ ހަމައެކަނި ﷲ ގެ ހަނދުމައިން ކަމެވެ. އެ މާނަ ކިޔާފައި އައިމަނަށް އަމިއްލަ ނަފްސާއި ހީލެވުނީ މިއީ އެއްވެސް ޙަޤީޤަތެއް ނެތް ވާހަކައެއް ކަމަށް ހިތް ބުނީތީވެއެވެ. "ﷲ ހަނދުމަކުރުން" އައިމަނަށް ސިފަވެގެން ދިޔައީ ހަމައެކަނި "ސުބުޙާނަ ﷲ" ނުވަތަ "އަލްޙަމްދުލި ﷲ" ފަދަ ޒިކުރުތައް ދުލުން ކިޔޭ ކިޔުމެއްގެ ގޮތުގައެވެ. ކިތަންމެ ގިނައިން އެ އެއްޗެހި ކިޔަސް އޭނަ ދެރަވެފައި ހުއްޓާ އުފާވާނީ ކިހިނެއްތޯ އައިމަންގެ ހިތް ސުވާލުކުރިއެވެ. އެ ޚިޔާލާއެކީ އައިމަން އެ ޞަފްޙާގެ ތިރީގައި ހުރި އާޔަތްތަކަށް ބަލާލިއެވެ. އެ ދިގުދިގު އާޔަތްތައް ފެނިފައި އައިމަން ތުން ފިއްތާލަމުން ދެލޯ ހަނިކޮށްލީ އެ އެއްޗެހި ކިޔަން ކަންނެތް ވުމުންނެވެ. މިއީ އޭނައަށްވުރެ ބޮޑަށް އަޒާން ޝައުޤުވެރިވެދާނެ އެއްޗެއްކަން އެވަގުތު އައިމަނަށް އެނގުންވިއެވެ. އެހެންކަމުން އޭނަ އޭތި އިތުރަށް ކިޔުމެއްނެތި އަޒާނަށް އޭތި ދޭން ނިންމިއެވެ. އެހެނަސް އަޒާން ވެސް މިދުވަސްވަރު އެ އުޅޭ އުޅުމުގެ ސަބަބުން އޭނައަށް ވެސް މިއަށް ވަގުތު ދެވޭނެ ކަމާމެދު އައިމަނަށް ޝައްކު ކުރެވުނެވެ.

އައިމަނަށް ހީވެފައި އޮތީ ރަނގަޅަށެވެ. ހުދާއާއެކީ ފާއިތުވަމުން ދިޔަ ދުވަސްތަކާއެކީ އަޒާންގެ އުޅުމަށް ނޭދެވޭ ބަދަލުތައް އަންނަމުން ދިޔައެވެ. ހުދާއާއެކީ ހޭދަކުރަމުން ދިޔަ ވަގުތުތައް ގިނަވުމުން އޭނަ އާ ކަންތައްތަށް އުނގެނުމަށް ހޭދަކުރާ ވަގުތު ވެސް ވަރަށް ބޮޑުތަން މަދުވެގެން ގޮސްފައިވިއެވެ. ބޭރުފުށުން އޭނަ މިހާރު މުޅިންހެން ނަކަލު ކުރަމުން ދަނީ ސްކޫލްގައި އުޅޭ އެންމެ މަޝްހޫރު ކުދިންނެވެ. ބޮލުގެ އިސްތަށިގަނޑުން ފެށިގެން ލާ ހެދުންތަކަށް ދާންދެން މިހާރު އޭނަ އެމީހުންނާއި އެއްގޮތެވެ. އެއީ އޭނައަށް އުނދަގޫ ގޮތަކަށް ވިޔަސް ސްކޫލަށް ދާއިރު އޭނަ ބެގީކޮށްފައި ވެސް ހުންނަނީ ހުދާއާއި ހުދާގެ އެކުވެރިން ރުހޭ ފަދަ ގޮތަކަށެވެ.

އޭނަގެ ވަށައިގެންވި މީހުން ރުއްސުމަށްޓަކައި ގަދައަޅައި މަސައްކަތް ކުރިއެއްކަމަކު އަޒާންގެ ކިބައިގައި އަދިވެސް ބަދަލުނުވާ ދެކަމެއްވިއެވެ. އެއީ އޭނަގެ ވިސްނުމާއި އޭނަގެ ހިތުގައި ހިނގާ ޖަޒުބާތުތަކެވެ. އޭނައަށް އަދި ވެސް އޭނަގެ ވަށައިގެން ފެންނަ ހުރިހާ ކަމަކާމެދު ފުންކޮށް ވިސްނެއެވެ. ކޮންމެ ދުވަހެއްގެ އިރުއަރާ މަންޒަރާއި އިރު އޮއްސޭ މަންޒަރަކީ ވަކިން ޚާއްޞަކޮށް އޭނަގެ ވިސްނުމަށް އިންޤިލާބެއް ގެންނަ ކަންތައްތަކެވެ. ކޮންމެ ދުވަހެއްގެ އިރު އޮއްސޭ ފަދައިން އޭނަގެ ޙަޔާތަށް ވެސް ނިމުމެއް އަންނާނެކަން ހަނދާންވާ ކޮންމެ ފަހަރަކު އޭނަގެ ހިތުގައި ކަންބޮޑުވުމެއް އުފެދެއެވެ. އެހެނަސް އޭނަ އެފަދަ ވިސްނުމެއްގައި ވަނިކޮށް ހުދާ ގުޅާ ކޮންމެ ފަހަރަކު އެ ހުރިހާ ކަމެއްގެ މަތިން ހަނދާން ނެތެއެވެ. އެހެނަސް އެ ބިރުވެރިކަން ދާއިމީ ގޮތެއްގައި އޭނަގެ ހިތުތެރޭގައި އަށަގެންފައިވި ފަދައެވެ. އޭނަ ކުރާ ކަންތައްތަކާއިމެދު އޭނައާ ސުވާލުކުރެވޭނެކަމަށް ހިތް ބުނާ ވަރުން ހުދާ އެދުނަސް އެރެއަށްފަހު އޭނައަށް ހުދާއާއި ގާތް ނުވެވެއެވެ. ހުދާއާއެކީ ރައްޓެހިވުމުގެ ގުޅުން އަދިވެސް ކުރިއަށް ގެންދަމުން ދިޔައީ މިއީ ޢާއްމުކަމަކަށް ވުމުން މިއީ "އެހާ ނުބައި" ކަމެއް ނޫންކަމުގެ ޢުޒުރު އޭނައަށް އަމިއްލަ ނަފްސަށް ދެވޭތީވެއެވެ. އޭގެ ހިތި ރަހަ އޭނަގެ ކަރު ބުޑުގައި ލާން އުޅޭ ދުވަސް ކައިރިވަމުން ދިޔަކަން އަޒާނަކަށް ރޭކާނުލައެވެ.

މިޑް ޓާރމް އިމްތިޙާނަށްފަހު ސްކޫލަށް ދާން އޮތް ފުރަތަމަ ދުވަހު އަޒާނަށް ހޭލެވުނީ 9 ޖެހި ފަހުންނެވެ. ގަޑި ފެނިފައި ކަންނެތް ކަމާއެކީ ތެދުވެލަމުން ސްކޫލަށް ނުދާން އަޒާން ނިންމިއެވެ. އެހެނަސް އޭނައަށް ލުއްކެއްޖަހައި ތެދުވެވުނީ ރޭ އޭނަ ފޭސްބުކަށް ޕްރޮފައިލް ޕިކްޗާރއެއްގެ ގޮތުގައި ލި ފޮޓޯގެ މަތިން ހަނދާންވުމުންނެވެ. އޭނަ ވަނީ ސްކޫލްގެ މަޝްހޫރު ބައިގަނޑުގެ ކުރިމަތީގައި އޭނަ ގަމީހެއް ނުލައި ހުރި ފޮޓޯއެއް ފޭސްބުކަށް ލުމަށް "ޑެއާރއެއް" ކޮށްފައެވެ. އެދުވަހު ގެއަށް ގޮސް އެފަދަ ގޮތަކަށް އަމިއްލަ ފޮޓޯއެއް ނެގުން ވެސް ވީ އަޒާން ލަދުގަންނަވަރުގެ ކަމަކަށެވެ. އެހެނަސް މި ލަދަކީ ވެސް އޭނަ "ކަޓު" ކުރުވާ ކަމެއްކަން ހަނދާންކޮށް އަޒާން އެ ލަދުގެ މަތިން ގަދަކަމުން ހަނދާން ނައްތާލަމުން ފޮޓޯ ނަގައި ފޭސްބުކަށްލިއެވެ. އަޒާނަށް އޭނަގެ އަމިއްލަ ފޮޓޯ ރީއްޗެއް ނުވިއެވެ. ރީތި ވީހީ އޭނަ ޓީވީއިން ފެންނަ ބިޔަ ފިރިހެނުން ފަދައިން ފުފިފައި ހުރިނަމަ ނޫންހެއްޔެވެ؟ ޕަބްލިކްކޮށް އެ ފޮޓޯ ޙިއްޞާ ކުރެވުމުން އަޒާންގެ ހިތުގައި ނުތަނަވަސްކަމުގެ ރާޅުބާންޏެއް ނެގީ މިއަށް މީހުން ބުނާނެ އެއްޗެއް ޔަޤީން ނުކުރެވުނީތީވެއެވެ. ދިމާވެދާނެ ބަހުގެ ޙަމަލާއެއްގެ ބިރުވެރިކަމުން އަޒާނަށް ވަގުތުން ލޮގް އައުޓް ވެވުނެވެ. އެހެނަސް މިއަދު ހެނދުނު އޭނަ ބިރުގަތީ ކޮންކަމަކަށްތޯ ބަލާލަން އޭނަ ކެތްމަދުވެފައިވިއެވެ.

އޭނައަށް ތަޢުރީފެއް ލިބިދާނެކަމުގެ ކުޑަ އުއްމީދަކާއެކީ އަޒާން ލޮގިންވީ ތަނާހެން މާ ގިނައިރެއް ނުވެ އޭނަގެ ޕްރޮފައިލް ޕިކްޗާރއަށް ލިބިފައިވި ކޮމެންޓްތައް އޭނައަށް ފެނުނެވެ. އެންމެ ފުރަތަމަ ވެސް ފެނިގެން ދިޔައީ އޭނައަށް މަލާމާތް ކުރާ މީހުންގެ ސަރުދާރު ކަމަށްވާ ސާޖިދު އޭނައާއި ދިމާލަށް އަމާޒުކޮށްފައިވި ނުބައި ބަސްތަކެވެ. އެއިން އަޒާންގެ ހިތަށް މާ ބޮޑު އަސަރެއް ނުކުރިއެއްކަމަކު ސްކޫލްގައި އުޅޭ އެހެނިހެން އަންހެން ކުދިންނާއި ހުދާގެ އެކުވެރިން ވެސް އޭނަގެ އެ ފޮޓޯއަކީ ސަމާސާއެއްގެ ގޮތުގައި ދެކި ވާހަކަ ދައްކާފައިވި ތަން ފެނިފައި އަޒާން ލަދުންގޮސް ހަލާކުވާވަރު ވިއެވެ. އެންމެ ބޮޑު ޝޮކެއް ލިބިގެން ދިޔައީ އެންމެ ފަހަތުގައި އޮތް ހުދާގެ ކޮމެންޓް ފެނިފައެވެ.

"މިކުއްޖާއާ އިންނާނެ އަންހެނަކު ބޭނުންވެއްޖެ. 100 އަހަރުން މަތި ވިޔަސް ހެޔޮ. ވެރީ ޑެސްޕަރޭޓް!" ހުދާގެ އެ ކޮމެންޓު ކިޔާފައި އަޒާންގެ ބޮލަށް އެނބުރުން އެރިއެވެ. މީގެ މާނަ ނަގަންވީ ގޮތް ޔަޤީން ނުވި ގޮތުން އަޒާންގެ ހިތަށް އިތުރަށް އުނދަގޫވިއެވެ. ސާޖިދުމެން ހުދާގެ ކޮމެންޓަށް ރިޕްލައިއެއްގެ ގޮތުން ބޭރުފުށުން އެމީހުން ހުތުރުކަމަށްދެކޭ މީހުންގެ ފޮޓޯތައް ޙިއްޞާ ކުރުމުން ހުދާ ހެވިފައިހުރި އިމޯޓިކޯންތައް ޙިއްޞާކޮށްފައިވިތަން ފެނިފައި އަޒާންގެ ބުމަގޮށްޖެހުނެވެ. މިކަން ސާފު ކުރުމަށްޓަކައި އޭނައަށް ކޮޅަށް ތެދުވެވުނީ ކުއްލިއަކަށެވެ.

ގޭގެ ކާރުގައި ސްކޫލަށް ގޮސް އަޒާން ވަގުތުން މިޞްރާބުޖެހީ ސްކޫލްގެ ކެންޓީނާއި ދިމާލަށެވެ. މިއީ އިންޓަވަލް ގަޑިއަށްވެފައި މިވަގުތު ހުދާ ހުންނާނީ ކެންޓީންގައިކަން ޔަޤީން ކުރެވުނީތީވެއެވެ. ކެންޓީނަށް ގޮސް ވަތްތަނާހެން އަޒާނަށް ހުދާ ފެނިގެން ދިޔައީ ސާޖިދުގެ ބައިގަނޑާއެކީ އެމީހުން އަބަދު އިށީންނަ މޭޒުދޮށުގައި އިންދައެވެ. އަޒާންގެ ގާތަށް އައިސްފައިވި ރުޅިއެއްގެ ސަބަބުން އޭނަ ޖެހިލުމެއްނެތި އެމީހުންގެ ކައިރިއަށް ދިޔައެވެ. އޭނަ އެމީހުންނާއި ކައިރިވީވީހެން ހުދާ އަޒާން ފެނިފައި ހުރިހާ ދަތްތައް ދައްކާލިއެވެ.

"އޮހް! ހިއާރ ކަމްސް ދަ ގްރޭޓް ސުޕާރމޭން." ހުދާ ރާގަކަށް އެހެން ބުނެލި ތަނާހެން އެމޭޒުދޮށުގައި ތިބި އެންމެން ބާރަކަށް ހޭންފެށިއެވެ. އެއިން ކެންޓީންގައި ތިބި އެންމެންގެ ނަޒަރުތައް އެދިމާލަށް ދަތުރުކުރިއެވެ. އަޒާން އެމީހުންނަށް ވަކިވަކިން ބަލާލުމަށްފަހު އަނެއްކާވެސް ހުދާއަށް ބަލާލިއެވެ.

"ހުދާ ވާއި؟" އަޒާން އޭނަގެ އަޑަށް ބާރު ލާފައި މާޔޫސީ ގޮތަކަށް އަހާލިއެވެ. އެއާއެކު ސާޖިދުގެ އެކުވެރިޔަކު އޭނަގެ ވާހަކައާއި ގުޅުވައިގެން ލަވައެއްގެ ތަންކޮޅެއް ކިޔާލިއެވެ. އެވެސް ވެގެން ދިޔައީ ކެންޓީންގައި ތިބި ގިނަ ބަޔަކު ހެއްވާލި ކަމަކަށެވެ. އަޒާން އެއަށް ފަރުވާލެއްނެތި ދެންވެސް ވާހަކަ ދެއްކިއެވެ.

"ޖަސްޓް ޓެލް މީ! ހުދާ ކުއްލިއަކަށް ތިގޮތަށް ކަންތައްކުރުމުގެ ފަހަތުގައި ސަބަބެއް އޮންނާނެ. އަހަންނަށް ގޯސްކޮށް ކުރެވުނީ ކޮންކަމެއް؟" އަޒާން އަވަސްއަވަހަށް އަހާލިއެވެ. އެއާއެކު ހުދާ ނުރުހުންވެގެން ދިޔަ މޫނަކާއެކީ ކުއްލިއަކަށް ކޮޅަށް ތެދުވެލައިފިއެވެ.

"ލޯބިވާ ކަމަށް ދަޢުވާ ކުރާ މީހާއަށް ނޭނގޭ އޭނަގެ ކައިރީގަ ހުރި މީހާ އޭނަދެކެ ލޯބިނުވާއިރު ވެސް. އަޑުއަހާ! މަ ދުވަހަކުވެސް ކަލޭދެކެ ލޯތްބެއްނުވޭ. ނުވެސް ވާނެ. އަހަރެން އެރޭ ހާމަ ކުރީ ޙަޤީޤަތް. ކަލޭ އަނބުރާ އައީ ކަލޭގެ މޮޔަކަމުން. މަ ބޭނުންވީ ބަދަލު! މަށަށް އައިމަން ނުލިބުމުގެ ބަދަލު. އައިމަން މަށާ ރައްޓެހިނުވީ ހަމައެކަނި ކަލެއާހެދި. ކަލޭ މަދެކެ ލޯބިވާތީއޭ ކިޔާފަ. ޗި! މަ ބޭނުމެއްނޫން ތިކަހަލަ......." ހުދާ ދެން ކިޔަންފެށީ މުޅިންހެން ނުބައި ބަސްތަކެވެ. ދައްކަން ފެށީ ގޯސްވާހަކަތަކެވެ. އަޒާންގެ ފިރިހެންވަންތަ ކަމާމެދު ވެސް ސުވާލު އުފެދޭ ފަދަ ވާހަކަތަކެވެ. އެ ވާހަކަތައް އަޑުއަހަން އަޒާނަށް ހުރެވުނީ ބުނާނެ އެއްޗެއް ވެސް ނޭނގިފައެވެ. ހުދާ ދައްކަމުން ދިޔަ ވާހަކަތަކުން ވަށައިގެން ތިބި އަންހެން ކުދިން ވެސް ހިނިތުންވުންތައް ފޮރުވަމުން ސިއްރު ވާހަކަތައް ދައްކަން ފެށި ގޮތުން އަޒާނަށް ދުވަހަކުވެސް އިޙްޞާޞް ނުކުރެވޭ ފަދަ ނިކަމެތިކަމެއް އިޙްޞާޞް ކުރެވުނެވެ. ވަކި ހިސާބަކުން އޭނައަށް ހުދާ ދައްކަމުން ދިޔަ ވާހަކަތަކަށް ވެސް ސަމާލުކަމެއް ދެވޭ ގޮތެއްނުވިއެވެ. އޭނަގެ ޙަޔާތް މިފަދަ ފައްތަރަކަށް އަންނަން ޖެހުނީ ކީއްވެތޯ އޭނައަށް އަމިއްލަ ނަފްސާއި ސުވާލު ކުރެވެން ފެށިއެވެ. ހުދާ ވަކި ހިސާބަކުން ވާހަކަ ހުއްޓައި އޭނަ ގާތު ދިޔުމަށް ނުހަނު ބާރަށް އަމުރު ކުރުމުން އަޒާން އިތުރު އެއްޗެކޭ ނުބުނެ ފަހަތަށް ޖެހުނެވެ. އެވަގުތު އޭނަ އެއްޗެކޭ ބުނުމުން އެއްވެސް ފައިދާއެއް ކުރާނެކަމުގެ އުއްމީދެއް ނެތުމާއެކު އެއްޗެކޭ ބުނަން އޭނަގެ ހިތް ނޭދުނީތީވެސްމެއެވެ. ހުދާއަށް ފަސްދީފައި ދާން ހިނގައިގަތް ވަގުތު އަޒާން އޭނަގެ އަމިއްލަ ޚިޔާލުތަކުގެ ތެރެއަށް ގެނބިގަތެވެ. މިއީ އަބަދުވެސް އޭނަގެ އާދައެވެ. މައްސަލައެއް ދިމާވުމުން މި މައްސަލަ އޭނައަށް ކުރިމަތިވާންޖެހުނު މައިގަނޑު ސަބަބާއި ހަމައަށް ނުދެވެނީސް އޭނައަށް ހުއްޓުމެއްނެތި ވިސްނޭނެއެވެ. ސްކޫލްގައި އިތުރަށް މަޑުކުރުމެއްނެތި ގޭގެ ޑްރައިވަރަށް ގުޅާލަމުން އޭނަ ގެއަށް ދިޔައީވެސް އަމިއްލަ ޚިޔާލުތަކާއެކީ އެކަނިވުމަށެވެ.

ގެއަށް ދިޔަގޮތަށް މިހާރުގެ އާދައިގެ މަތިން އަޒާން ގޭގައި ހުރި ރަޝީދައްތަގެ އެއްވެސް ސުވާލަކަށް ޖަވާބެއް ދިނުމެއްނެތި ކޮޓަރިއަށްވަދެ ދޮރު ތަޅުލިއެވެ. އެއަށްފަހު އޭނައަށް މިފަދަ ޙާލަތްތަކުގައި އިށީންނަން އެންމެ ކަމުދާ ތަން ކަމުގައިވާ އެނދުގެ ކައިރިން ބިންމަތީގައި އިށީނދެވުނެވެ. ދޮރުގައި އެތައް ފަހަރަކު އެކި މީހުން ޓަކި ދިން އަޑު އިވުނެއްކަމަކު އަޒާން ކަހާތަން ހިރިވެސް ނުލައެވެ. ރުޅިން ރަތްވެފައި ހުރި އައިމަން ގެއަށް އައީވެސް އަޒާން އެ އިންގޮތަށް އިންދައެވެ.

"ޒާން އަހަރެން ކައިރި ނުބުނެ އެ ޑެއާރޔާ އެއްގޮތަށް ކަންތައް ކުރީ ކީއްވެ؟ އެމީހުން ހިތުން މާ މޮޅުކަމެއް ކުރެވުނީ. މިއަދު އެ ހުދާ އެކަމަށްޓަކައި ސަސްޕެންޑު ކުރެވިއްޖެ. އަދި އެ ސާޖިދުމެންނަށް ވެސް ކުޅި ދައްކާލާނަން! ދެންވެސް މި ދޮރު ހުޅުވަބަލަ!" ބޭރުން ވާހަކަ ދެއްކި އައިމަން ގޮތް ދޫނުކުރުމުން އަޒާން އެންމެ ފަހުން ގޮސް ދޮރު ހުޅުވިއެވެ. އަދި އައިމަނަށް ވާހަކަ ދެކެވުމުގެ ކުރިން ވާހަކަ ދެއްކިއެވެ.

"އެމީހުންގެ ކިބައިން ބަދަލު ހިފައިގެން ލިބޭނެ ފައިދާއެއްނެތް. އައި ޑޯންޓް ނީޑް ހެލްޕް. ލީވް މީ އެލޯން!" އަޒާން ހިސާބެއްގެ ހަރުކަށިކަމަކާއެކީ އެހެން ބުނެ ބާރަށް ދޮރު ލައްޕާލީ އޭނަގެ ސީރިއަސްކަން އައިމަނަށް އިޙްޞާޞް ކޮށްދިނުމަށެވެ. އެކަން ކާމިޔާބުވެސްވިއެވެ. އެއަށްފަހު އޭނައަށް އައިމަންގެ އުނދަގުލެއް ނުފޯރައެވެ.

ދުވާލުގެ ގަޑިއިރުތައް ވޭތުވަމުން ދިޔައީ އަޒާން އޭނަގެ ކޮޓަރީގެ އެނދުމަތީގައި އިންދައެވެ. އެއީ ވަކި އޭނަ ހުދާއާއި މެދު އާވާރާވެފައިވީތީވެއެއްނޫނެވެ. ހުދާއާއި ވަކިވި ކަމަށްޓަކައި އޭނަ މާ ބޮޑު ދެރައެއް ނުވެއެވެ. އެކަންވެސް ވެގެން ދިޔައީ އަޒާން ޙައިރާން ކުރުވިކަމަކަށެވެ. އޭނަ އެމާމެދު ދެރަނުވަނީ ކީއްވެބާއޭ ހިތަށްއަރަމުން ދިޔައެވެ. މީގެ މާނައަކީ އޭނައަށް ދުވަހަކުވެސް ހުދާދެކެ ޙަޤީޤަތުގައި ލޯބިނުވެވޭކަން ހެއްޔެވެ؟ އެ ސުވާލުގެ ޖަވާބު އަޒާނަށް އޭނަ ވިސްނި ވިސްނުމުން ލިބުނެވެ. އާނއެކެވެ. އޭނަ ލޯބިވީ ހުދާދެކެއެއް ނޫނެވެ. އަމިއްލަ ނަފްސުދެކެއެވެ. އޭނަ ހުދާ އެންމެ ފުރަތަމަ ވެސް ބޭނުންވީ އަމިއްލަ ބޭނުމަކަށެވެ. އަމިއްލައަށް ހޯދަން ޖެހިލުންވެފައިވާ ކަމެއްގެ އެހީއެއްގެ ގޮތުންނެވެ. އޭނަ ހުދާއާއި ރައްޓެހިވާން ބޭނުންވީ އެހެން ފިރިހެން ކުދިންހެން "ގަދަ" މީހަކަށްވުމަށެވެ. ވަކި ހުދާއާއި އަޅާލައި ލޯބިދިނުމަށްޓަކައެއްނޫނެވެ. މިފަދަ ޚިޔާލުތައް އަޒާންގެ ސިކުނޑީގައި ދައުރުވާން ފެށި ވަގުތު އޭނައަށް ފުން ނޭވައެއް ދޫކޮށްލެވުނެވެ. އޭނަގެ ހިތަކީ މިހާ ހަރު އެއްޗެއްކަމެއް އޭނަ ކުރިން ނުދެނެ ހުއްޓެވެ. އެ ހިތް މަޑު ކުރުމަށްޓަކައި ކުރާނީ ކީއްތޯ ހިތަށް އެރި ހިނދު ނޭނގޭ ސަބަބަކާހުރެ އަޒާނަށް ކޮޓަރީގެ ކުޑަދޮރާއި ދިމާލަށް ނަޒަރު ހިންގާލެވުނެވެ. އެ ކުޑަދޮރުގެ ބޭރުން ފެނިގެން ދިޔައީ އެގޭގެ ބިއްދޮށުގައި އޮންނަ ބަގީޗާގެ ފެހިކަމާއި ހަވީރުގެ އެ ވަގުތު އަޅި ވިލާތަކުން ފުރި ބާރުވެފައިވި އުޑެވެ. އެދިމާލަށް ބަލަން އިނދެފައި އަޒާން ކޮޅަށް ތެދުވެ ލަސް ހިނގުމެއްގައި ގޮސް ހުޅުވިފައިވި އެ ކުޑަދޮރު ކައިރީގައި މަޑުކޮށްލިއެވެ. އެއަށްފަހު މައްޗަށް ބަލާލީ އޭނަ އެއާއިމެދު އަބަދުވެސް އަޖާއިބުވެފައިވި އުޑު ދެކިލުމަށްޓަކައެވެ.

އަޒާންގެ ހަނދާނަށް އަންނަން ފެށީ ކުޑައިރުއްސުރެ އޭނައަށް ކުރެވެމުންދާ ޚިޔާލުތަކެވެ. މި ބޮޑު މާ ސިންގާ އުޑު އެންމެންގެ ބޯމައްޗަށް ނުވެއްޓި ހުރި ގޮތަށް އެ ހުންނަނީ ކީއްވެބާއޭ އޭނަގެ ހިތް ސުވާލުކުރެއެވެ. އުޑު ފެންނަ ކޮންމެ ފަހަރަކު އޭނަގެ ހިތަށް ލޮޅުމެއް އަންނަނީ އެ ސުވާލުގެ ސަބަބުންނެވެ. ބޮޑުވަމުން އައި ވަރަކަށް ހުރިހާ ތަކެއްޗެއް އުފައްދަވައި އެތަކެތި ބަލަހައްޓަވަނީ ﷲ ކަން އަޒާނަށް ދަސްވިއެވެ. އުޑުވެސް އެގޮތުގައި ދަމަހައްޓަނީ ﷲ ކަން އެނގުނު ދުވަހު ﷲ ގެ ކުޅަދުންވަންތަކަން އަޒާނަށް އިޙްޞާޞްވިއެވެ. ހަމަ މިއާއެކު އެކަލާނގެ އިރާދަކުރެއްވި ކޮންމެ ކަމެއް ވަށޭ ވަޙީ ކުރެއްވުމުން ވާކަން އެނގުނު ދުވަހު އަޒާންގެ ގައިން ހީބިހި ނަގައިގެން ދިޔައެވެ. އަހަރުމެންނަށް ހުރިހާ އެއްޗެއް ދެއްވި ﷲ ސުބުޙާނަހޫ ވަތަޢާލާއަށް އެކަލާނގެ ބޭނުން ހިނދަކު ނުހަނު ފަސޭހައިން އަހަރުމެން ސުންނާފަތި ކުރެވިދާނެކަން އެނގުންވުމުން އޭނަ އިންތިހާއަށް ބިރުގަތެވެ. އޭނައަށް ފާފަ ފުއްސެވުމަށް އެދި ދުޢާ ކުރެވެން ފެށީ އެދުވަސްފަހުންނެވެ. އެ ދުޢާތައް އިޖާބަވާހެން އަޒާނަށް ހީވީ އޭނަ ބިރުވެރިކަމާއެކީ އިންތިޒާރު ކުރަމުން އައި ﷲ ގެ ޢަޒާބު އޭނައަށް ނުފެނުމުންނެވެ. އެކަލާނގެ ހެއްދެވި އުޑުގެ ދަށުގައި އެކަލާނގެ ފެތުރުއްވި ބިންމަތީގައި ނުބައި ކަންތައް ކުރެވެމުން ދާއިރު ވެސް އޭގެ ބަދަލެއްގެ ގޮތުން އެކަލާނގެ އެއްވެސް ބޮޑު ކަމެއް ނުފޮނުވާކަން އެނގުންވާ ކޮންމެ ފަހަރަކު އަޒާންގެ ހިތަށް ޙައިރާންކަމެއް ވެރިވެއެވެ. ބިސްމީގައި އެވާ ﷲ ގެ ރަޙްމަތަކީ މިއީތޯ އޭނަގެ ހިތަށްއަރައެވެ. ހަމަ އެއާއެކު އެކަލާނގެ އަޅުތަކުންދެކެ އެކަލާނގެ ލޯބިވެވޮޑިގެންވާ މިންވަރު ވެސް އަޒާނަށް އިޙްޞާޞް ކުރެވުނެވެ. އެ ލޯބިފުޅުގެ ބަދަލުގައި އޭނައަށް ކުރެވޭނީ ކޮންކަމެއްތޯ އަޒާންގެ ހިތް ތަކުރާރުކޮށް ސުވާލުކުރެއެވެ.

އެވަގުތު ކޮޅުވެސް ހިތަށްވެރިވި އެ ސުވާލާއެކީ އުޑާއި އެކީ އޭނަގެ ކުރިމަތީގައިވި ﷲ ހައްދަވާފައިވާ ފެހި ވިނަތަކާއި ގަސްތަކަށް ވެސް އަޒާނަށް ނަޒަރު ހިންގާލެވުނެވެ. އޭގެ މާ ގިނައިރެއްނުވެ ބޯކޮށް ވާރޭ އޮއްސިގަތެވެ. ވާރޭގެ ތިކިތަށް އޭނަގެ މޫނަށާއި ގަޔަށް ވެސް ބުރަން ފެށިއެއްކަމަކު އަޒާން ދުރުވާކަށް ނުއުޅުނެވެ. އޭނަގެ ނަޒަރު ހުއްޓިފައިވީ ވާރޭގެ ތިކިތަކުން ފެންވެރެމުން ދިޔަ ކުދި ކުދި ގަސްތަކަށެވެ. މާ ގިނަ ދުވަހެއް ނުވެ މި ވާރޭގެ ސަބަބުން އެ ގަސްތައް ބޮޑުވާނެކަން ވިސްނުމުން ވެސް އަޒާނަށް ﷲ ގެ ކުޅަދުންވަންތަކަން އިޙްޞާޞް ކުރެވުނެވެ. އެކަލާނގެ ކޮންމެ އެއްޗެއް ވެސް ލައްވަވާފައިވަނީ ވަކި މަޤްޞަދަކަށްޓަކައިކަން އަޒާނަށް ހިތުގެ އެންމެ ފުންމިނުން ޤަބޫލު ކުރެވުނެވެ. އެކަލާނގެ އުފައްދަވާފައިވާ އުޑާއި ބިން އެކީގައި ގުޅިގެން މި މަސައްކަތްކުރަމުން ދަނީ ވެސް ހާދަ ފުރިހަމައަށެވެ. ﷲ ހެއްދެވި ހުރިހާ އެއްޗެއްގައި ވެސް މަޤްޞަދެއްވާނަމަ އޭނަ ދުނިޔޭގައި އެއްވެސް މަޤްޞަދެއް ނެތި މިހިރީ ކީއްވެ ހެއްޔެވެ؟ އެ ސުވާލު އަޒާންގެ ހިތަށް ފުރަތަމަ ފަހަރަށް ވެރިވިއެވެ.